सुर्याला थंडी वाजते जेव्हा

सुर्याला थंडी वाजते जेव्हा
चांदण्यांची शाल घेतो
किरणांचा दिवा मालवून
लवकर लवकर झोपी जातो

सूर्याची अवस्था बघून
चंद्रालाही दया येते
सूर्याला सांगतो आराम करा
तुमची ड्युटी मी करतो

सूर्याला काही करमत नाही
उगवल्याशिवाय रहावत नाही
झोपतो झोपतो म्हणता म्हणता
थोडावेळ येऊन जातो

चंद्रराव रागे भरतात
सूर्याला घरी धाडतात
हुरडा माडगं खायला सांगतात
सूर्य त्यांची आज्ञा पाळतो

सूर्य मस्त आराम करतो
पौष्टिक पौष्टिक अन्न खातो
चंद्राचे आभार मानून
आग ओकण्यास सज्ज होतो