उल्टी सलवार

अडचणीत फसलेली एक मोलकरीण, कामवाली. थोड्या पैशांसाठी बदल्यात शरीरसुख ओरबाडणारा मालक. तिच्या चेहऱ्यावर चिंतेचं सावट... माझं काम होईल ना, मला पैसे मिळतील ना असं काळजीने विचारणारी ती जेव्हा खोली उघडून बाहेर पडते तेव्हा गडबडीत ती उलटी सलवार घालते. त्यातही शेजारचे कुणी पहात तर नाहीत ही खात्री करून दार उघडणारा तो.

सगळं आटपून तो टीव्ही बघत असतो आणि मिळणाऱ्या प्रमोशनच्या खुशीत बायको घरात आनंदातच येते. चिवचिव करत इतर स्टाफ कसा जळतो तरी मलाच प्रमोशन मिळणार कारण मॅनेजर माझ्या कामावर खुश आहेत ... आणि त्याचं लक्ष जातं तिने घातलेल्या उलट्या सलवारवर... द एन्ड

#उल्टी_सलवार - सहादत हसन मंटोच्या कथेवर बेतलेली ही केवळ 6-7 मिनिटांची शॉर्ट फिल्म खूप काही सांगून जाते. शरीर विक्रीच्या दोन बाजू ठळक दिसतात. मोलकरीण शरीर विकते, तिच्या चेहऱ्यावर असहाय्य भाव असतात, तिला पैसे हवे असतात; आणि त्याची बायको जमीर विकते, चूक वागल्याची, लाच दिल्याची शरम तिच्या चेहऱ्यावर अजिबात नसते , उलट प्रमोशन मिळाल्याचा आनंद ओसंडून वहात असतो.

शेवटी काही वाक्य दिसतात आणि फिल्म संपते. चेहरे बदलतात पण गोष्टी बदलत नसतात. जेव्हा तुम्ही कुणाच्यातरी जवळचे लोक वापरत असता तेव्हा तुमच्या जवळचे लोक दुसरं कुणीतरी वापरत असतं. सगळं देणंघेणं असतं, जे देतो तेच परत मिळतं.

Karma whether good or bad is a result of what we do in our life. Some says it is the mirror of what we do to others.

#Karma_is_bitch

©अर्चना चंद्रसेन

रँडम_थोट्स2

अपूर्णता, दुर्लक्षित राहिल्याची भावना, सतत आपल्यावर अन्याय-अत्याचार होतात हे विचार माणसाला बंडखोर बनवतात. मनामध्ये एक आग खदखदत असते. इतर माणसांसारखेच आपण आहोत तरी आमच्यावर अन्याय आणि भेदभावाची वागणूक का? हे प्रश्न मनात भेडसावू लागले की पुढची वाटचाल फार कठीण असते. ह्यातूनच अतिरेकी विचारांची निर्मिती होत असावी.

स्वतः सबळ होणं, शिक्षित आणि सक्षम होणं हाच एकमेव मार्ग असतो जो आपल्यातली न्यूनगंडाची भावना आणि त्यातून तयार होणारी बंडखोरी कमी करतो. जगातले दोन लढे ह्याबाबत आदर्श असे आहेत. काळ्यांची समानतेसाठीची लढाई आणि महाराष्ट्रातील दलितांची सामाजिक उत्थानाची लढाई. काळे आणि दलित शतकानुशतके अन्याय सहन करून पिचलेले होते , संघर्ष करून त्यातून ते बाहेर आले. ह्या दोन्ही लढ्यात त्यांना मिळालेले नेतृत्व असामान्य होते त्यामुळे काळे आणि दलित कोणत्याही वाईट चक्रात न सापडता स्वतःला समृद्ध करते झाले.

खूप सोपं असतं बंडखोरी करून इतरांना त्रास देत रहाणं. उपद्रवमूल्य अधिक असलं की अंजरलं गोंजरलं तरी जातं किंवा पेकाटात लाथ तरी बसते. आपल्याला हीन, दुय्यय वागणूक मिळतेय हे समजलं की स्वतःला प्रगल्भ करणं हाच एकमेव मार्ग असतो जो मुख्य प्रवाहात आणि अग्रभागी आणून ठेवतो. स्वतःला मोठं करणं हे आपल्या हातात असतं, दुसऱ्याची रेघ पुसून स्वतःला कधीही मोठं होता येत नाही. स्वतःची रेघ मजबूत वाढवत न्यायची हाच मार्ग सगळ्यांच्या हिताचा असतो.

#violence_is_the_last_refuge_of_the_incompetent

#रँडम_थोट्स2

ब्रेक डॅम रुल्स

गेले काही दिवस #ईशान_हिलाल ह्या मुलाच्या मी अक्षरशः प्रेमात आहे. तो पुरुष आहे, त्याला नाचायला आवडतं. नृत्य हे त्याचं पॅशन आहे. तो ड्रेस डिझायनर पण आहे. अवघा चोवीस वर्षांचा हा मुलगा प्रचंड फ्लेकजीबल आहे. तो भारतातला व्यावसायिक पुरुष मेल बेलीडान्सर आहे. दिल्लीत राहणारा हा मुलगा नाचतो सुंदर म्हणून मला आवडतो असं नाही, त्याचा डान्स उत्तमच आहे पण आपल्याला आवडत्या गोष्टी करण्यासाठी, मिळवण्यासाठीचा त्याचा झगडा त्याच्या प्रेमात पाडतो. त्याने कथ्थक नृत्य सुद्धा शिकले आहे. जेव्हा त्याने आईला आपल्या डान्स पॅशनबद्दल सांगितलं तेव्हा तू मर्दानी गोष्टी का करत नाहीस हा आईचा पहिला प्रश्न होता, हे नचनियो सारखं तू नाचायला का मागतोस. त्यात इस्लाममध्ये डान्स हराम समजला जातो त्यामुळे विरोध त्या कारणामुळे सुद्धा झाला. आपल्या आवडीचं करियर निवडतानाही ते तुमचं पुरुष किंवा बाई असणं गृहीत धरून बघितलं जातं. पुरुषाने कोणते प्रोफेशन करावेत कोणते करू नयेत. बाईने कोणते करावेत की घरच सांभाळावे ह्या समजुती इतक्या घट्ट आहेत की ईशान सारख्या मुलांना अक्षरशः मारहाणीलासुद्धा सामोरं जावं लागतं. त्याच्या डान्समुळे तो 'गे' तर नाही, त्यामुळे 'तसले' धंदे तर करत नाही ह्या अशा अनेक शंकामुळे ईशान सध्या आपल्या कुटुंबापासून दूर झालाय. इतकंच काय तर त्याची गर्ल फ्रँड सुद्धा त्याला सोडून गेली.

बीबीसीने घेतलेल्या मुलाखतीत इशानने त्याची खंत बोलून दाखवलीय. पूर्वापार धारणामुळे आपण किती दिवस माणसाचं मूल्यमापन करणार आहोत हा त्याचा प्रश्न आहे. किती दिवस आपण फक्त कपडे, स्तननितंबाच्या हालचाली बघणार आहोत? नृत्याविष्काराकडे एक कला म्हणून का बघितलं जात नाही? आपल्या आजूबाजूच्या लोकांनी, नातेवाईकांनी आपलं पॅशन, आवड समजून घ्यायला हवी . प्रत्येकाने  स्वतःवर विश्वास ठेवावा आणि स्वतःला हवं तेच करावं, लोकं तुम्हाला कायम खच्ची करत असतात त्यामुळे हार मानू नये. विल पॉवर स्ट्रॉंग ठेवावी.

ईशान हिलाल हा मुलगा एक आशा आहे ,उमेद आहे जो जेंडर बायस व्यवस्थेला छेद देऊन त्याच्या छाताडावर पाय देऊन दिमाखात उभा आहे. एक यशस्वी व्यावसायिक डान्सर म्हणून त्याचं करियर उत्तम सुरू आहे. युट्युबवर त्याचे डान्स व्हिडिओज धुमाकूळ घालत आहेत. व्यवस्थेला ठोकर मारणारी ही नवी मुलं मला कायम प्रेमात पाडत आलीत. आकाश उत्तुंग आहे, पंख फैलावून भरारी घ्यायचं काम आपलं आहे. यश मिळतच जिगरबाज असणं महत्वाचं.

#ब्रेक_डॅम_रुल्स

#बुरसटलेले_जुनाट_विचार_फाट्यावर_मारा

©अर्चना चंद्रसेन

मनाची अवस्था झालीये
निर्वात पोकळी सारखी
याला कारण तुझं नसणं कि
असून नसल्यासारखं दाखवणं

तशीही तुझ्या असण्याची
इतकी सवय चांगली नाही
तु नसताना जीव होतो कासावीस
जे व्हायला नको आहे मला

तू आता जर गेलाच आहेस
कुठंतरी लांब न सांगता
तर बरंच आहे कि
मला हि आजमावता येतील माझ्या भावना

तू आता येऊच नकोस परत
माझ्या भावविश्वात भूकंप घडवायला
ते झेपण्याची ताकत कधीच संपलीये
तसं दिल हलकं नाही आपलं, तरी

तरी ... नकोच येऊस परत कधीही

©अर्चना चंद्रसेन