आहे ते तसे राहू द्यावे

लिंपु नयेत भिंती काही
थोडेसे तडे राहू द्यावे

करावे विसर्जन त्यांचे
गाभारे रिते राहू द्यावे

सांधू नयेत दऱ्या खोऱ्या
दुरावे वरतून राहू द्यावे

मिटवू नयेत नावे धुळीतून
पुरावे अंतरात राहू द्यावे

काय कसे कधी कुठे पुसू नये
हसणे गूढ मुखी राहू द्यावे

बसावे घरट्यात आपुल्या
मिटले पंख शांत राहू द्यावे

त्या तिथे नजर रोखलेली
इशारे अबोल राहू द्यावे

©अर्चना चंद्रसेन