आदर्शवादाचे बळी 1

आई

प्रेमस्वरूप आई वात्सल्य सिंधू आई

जिच्या हाती पाळण्याची दोरी ती जगाला उद्धारी

या आणि अशा अनेक कवितांतून आईची महती सांगितली आहे. आणि आई असतेही तशीच. 95% आया तरी आईच्या महती सारख्याच असतात. उरलेल्या 5% स्त्रियांना आईपण निभावण्यासाठी स्वतःची छोटी छोटी स्वप्न आणि मोठी स्वप्नही बाजूला सारावी लागतात, मन मारून बऱ्याच वेळा तडजोड करावी लागते. आता तुम्ही म्हणाल हिला तसा अनुभव आहे का तर नाही सुदैवाने किंवा काहीही म्हणा माझी आई 95% तली होती, आणि मी कधी इकडे कधी तिकडे अशी येरझाऱ्या घालत असते. माझी स्वप्न मी मुलांच्या थ्रू पूर्ण करणार असं बोलणाऱ्या बायका बघितल्या कि काळजावर नकळत ओरखडा निघतो.

आईपणाच्या वेदीवर एक स्त्री म्हणून आणि माणूस म्हणूनही तिची स्वतःची स्वप्नं, इच्छा आकांक्षा बळी पडतात, त्याबद्दल बरेचदा ती तक्रारही करत नाही कारण आई म्हणजे त्याग हे मनावर ठसवलेले असतं. माझ्या पिढीपर्यंत तरी असंच सुरु आहे पुढची पिढी कशी बदलते माहित नाही. सकारात्मक बदल व्हावेत अशी मनोमन इच्छा मात्र आहे