हातातलं पेन टेबलवर ठेऊन तिने परत मोबाईल चेक केला, नवीन मेसेज वगैरे काही दिसला नाही. फोन खाली ठेवून तिने दोन्ही हात डोक्यावर हात सरळ करून एक मोठ्ठा स्ट्रेच घेतला ताठ बसून मान खांदे हलवले, बोटं एकात एक अडकवून कटकट मोडली. दोन तास होऊन गेले #ती मान खाली घालुन लिहीत होती, आता थोडं रिलॅक्स होणं तर जरुरी होतं न बॉस. तिला आळस तर खूप आला होता पण हातात घेतलेली असाईनमेन्ट तर पुरी करावी लागणार होती, हल्ली कॉम्पुटरवर टाईप करायची सवय लागल्याने लिहायची सवय मोडली होती पण तिचा PC बंद असल्याने तिने हाताने लिहायला सुरुवात केली होती, तिच्या ऑफिसला फोन करून तिने तसं कळवून टाकलं होतं. मान पाठ एक झाली होती तिने परत एकदा वैतागून फोन चेक केला, निराश होऊन फोन खाली ठेवून ती खुर्चीतून उठली. गॅसवर एक कडक चहा केला आणि हातात कप घेऊन खिडकीत जाऊन उभी राहिली. संध्याकाळ होऊ लागल्याने पक्षांची किलबिल सुरु झाली होती. तिला जरा प्रसन्न वाटू लागलं, चहा पिऊन कप सिंक मध्ये टाकला आरशात डोकावून चेहरा ठाकठीक आहे की नाही हे एकदा बघून पायात सॅन्डल अडकवून ती घराबाहेर पडली.
एक तासभर मस्त मोकळ्या हवेत फिरून ती घरी आली, एकटा जीव सदाशिव साग्रसंगीत स्वयंपाक करायलाच हवं असं काही नाही. दारातच मोबाईल वाजत असलेला ऐकू आलं गडबडीत ती मोबाईल घरीच विसरून गेली होती. पटकन उचलून तिने चेक केलं तर कम्पनी जाहिरातीचा मिस कॉल दिसला तिच्या चेहऱ्यावर एक निराश छटा चमकून गेली. रात्री खायला थालपीठ करणार होती तोही मुड निघून गेला तोंड कडवट पडलं. कोपऱ्यावरच्या हॉटेलात फोन करून सँडविच मागवले ते कसेबसे खाऊन वर घटाघट पाणी प्याली. टीव्ही बघायचा सुद्धा मुड न्हवता ती चॅनल सर्फिंग करत बसली कंटाळून सगळं बंद केलं लाईट घालवले आणि बेडवर जाऊन आडवी झाली.
बेडवर पडली तरी तिच्या डोक्यातले विचार थांबत न्हवते, एक भकास उदासीनपणा भरून राहीला होता, घड्याळ रात्रीचे 12 वाजून गेलेलं दाखवत होतं डोळे मिटायचं नाव घेत न्हवते. तितक्यात उशिजवळच्या फोन वर मेसेज आल्याचा आवाज आला चपळाईने तिने फोन उचलला आणि व्हाट्स एप्प वर मेसेज पाठवणाऱ्याचं नाव वाचून टचकन डोळ्यात पाणी उभं राहिलं. साधा मेसेज होता 'काय करतेस'. खूप दिवसांनी अचानक जिवलग भेटल्यावर होते तशी तिची अवस्था झाली होती. तिने पटकन उत्तर दिलं.
गप्पा सुरु झाल्या त्याच्या गळ्यात पडून आपण बोलतोय आणि तो आपल्या केसात बोटं फिरवून हळुवार चौकशी करतोय असं फीलिंग तिला येऊ लागलं, नकळत ती अजून त्याच्या कुशीत सरकली आपलं थकलेलं डोकं त्याच्या बाहुवर ठेऊन शांत निवांत झालेल्या मनाने तिची आणि त्याची कुजबुज सुरु झाली. मध्यरात्र केव्हाच टळून गेली होती तिच्या फोनची बॅटरी 20 टक्केपेक्षा जास्त उतरल्याने अलर्ट टोन वाजला. लगेच तिचा मेसेज 'फोन बंद पडेल रे बॅटरी उतरली' 'आता भेटलो कि तुला पॉवर बँक देतो गं' ती कल्पनेने शहारत मोहरत होती. फोन कधीच बंद पडला. मानसिक समागमानंतरचा अनावर थकवा आणि आत्मिक आनंदाने ती कधीच झोपेच्या अधीन झाली होती
