उसवलेलं अस्तर

तुम इतना जो मुस्कुरा रहे हो
क्या गम है जिसको छुपा रहे हो

वरवरच्या सुखाआड खूपखूप दुःख लपलेलं असतं
हसऱ्या चेहऱ्याआत बेसुमार वेदना असते
कोऱ्या इस्त्री मारलेल्या डोळ्यात प्रचंड तुफान दडलेलं असतं
खळाळत्या पाण्यात घट्ट भावनांचं शेवाळ असतं

बेभान वाऱ्यात रुतून बसलेलं शल्य असतं
मुसळधार वळीवात गोठलेलं आभाळ असतं
मघाच्या थंडीत ज्वानीचा ज्वर असतो
वैशाख वणव्यातहि थंडथंड प्रतिसाद असतो

तुझ्यामाझ्या प्रेमात अबोल्याचा कहर असतो
नको तिथं उधाणलेला तिचा अतृप्त सागर असतो
अथांग समुद्रात स्थिर छोटी नाव असते
जल्लोषाच्या आतही दर्दभरी रात असते

उजळलेल्या रोषणाई सोबत मागे दाट अंधार आहे
सुग्रास जेवून भरल्या पोटी नित्य चिरंतन भूक आहे
सगळं कसं छान छान आहे तरी कोरं एक पान आहे
संसाऱ्याच्या तलम वस्त्राला उसवलेलं अस्तर आहे