भाव

ह्या फुलाचा गंध वेगळा
तू त्याला स्पर्श केला

आज नव्याने घडले काही
धडा तसा जुना वाचला

वाड्याचे खांबही तुटले
एक चिरा पुन्हा निखळला

आशावादाची राखरांगोळी
दिवा फडफडून विझला

तू म्हणाला दूर जाऊ
पसारा इथला मी आवरला

अश्रूंना किती टाळावे
गहिवर होता आत कोंडला

तुला वाटते मी बदलले
रंग तुझाहि बदलला

संसाराचे वस्त्र देखणे
अस्तराचा पोत विरला

कुणी कशावर किती मरावे
समजूनही जीव झुरला

जगी व्यर्थ सगळे नश्वर
तुक्याचा भाव तरला