फुल्ल दारू पिऊन लडखडत घरात घुसलेल्या लखुला बघून त्याची दोन्ही पोरं पार घाबरून खाटंखाली दडून बसली, पिल्यावर सगळया जगाचा राग तो बायकोपोरांवर काढायचा आणि चोपचोप चोपायचा. त्याची बायको चार घरची धुनीभांडी करून संसार रेटत होती. लखुला चांगल्या पगाराची नोकरी पण दारूपायी पैसाच पुरत नव्हता. टोपल्यातली एकुलती एक भाकरी हातात घेऊन कढईतच कालवणात चुरून वर तांब्याभर पाणी पिऊन लखू तिथंच कलंडला. चांगली तीनचार तास झोप घेऊन थोडी उतरल्यावर मोरीत तोंडावर पाण्याचे हबके मारून लखुने खिसा चाचपडला. हातात धा धा च्या तीनचार नोटा आल्या. परत देशीवादाकडे वळायची तलफ आली तसा पायात चपला सरकवून लखू दाराबाहेर पाय टाकणार तोच धाकलं पोरगं आडवं आलं. 'बाप्पा भूक लागली, आईला यायला येळ आहे पैसं दे की, आमी दोघ तवर वडापाव तरी खाऊन येतो'. पोरांची भुकेली तोंडं बघून पण लखू जराबी पाघळला नाही उलट पोरांना ढकलून तसाच बाहेर पडला. संध्याकाळचे पाच वाजून गेले होते, कोपऱ्यावरची कन्याशाळा सुटली होती. हिरवा स्कर्ट आणि पांढऱ्या पोलक्यातले मुलींचे थवे कलकल करत घरी निघाले होते. लखू जाताजाता पोरींना निरखीत होता, त्याचा अवतार बघून मुली लांबून लांबून जात होत्या. दोन लहानग्या बहिणीबहिणी एकमेकींच्या हाताला धरून घरी निघाल्या होत्या आणि लखुनं गपकन त्यांना अडवलं, तशा पोरी दचकून जाग्याव उभ्या राहिल्या. दोघींच्या तोंडावर मायेनं हात फिरवीत लखुने खिशातल्या चुरगळलेल्या नोटा त्यांच्या हातात कोंबल्या. घरी जाताना चॉकलेटी घेऊन खा गं अन वैनीला सांगू नका काकानं दिलं म्हणून' मान हालवून दोघी पुढं निघून गेल्या अन पुढच्या नाईन्टीची सोय करायला लखू कुणाकडं हात पसरावं ह्या विचाराने डोकं खाजवीत बराचवेळ पोरी गेल्या त्या दिशेला बघत राहिला.
स्वतःच्या भुकेल्या मुलांना खायला पैसे न देणाऱ्या लखुने भावाच्या मुलींचा लाड का बरं केला असेल.
No comments:
Post a Comment