सदा सर्वदा योग तुझा घडावा

आमच्या सोसायटीत ओळीने सहा बिल्डिंग आहेत. मराठी कुटुंब बोटावर मोजण्याइतकी म्हणूनच जास्त आपुलकी. समोरच्या बिल्डिंगमध्ये उमर सत्तरपार पण दिल सोळा ते बावीस सोडतंच नाही असे काका एकटेच रहातात. पैसापाणी चिकार आहे, तब्येत खटाखट आहे त्यामुळे एकटे असले तरी जगणं छान एन्जॉय करतात. तीनचार महिन्यांपूर्वी ऑफिसला निघाले तर काका खिडकीत उभे आणि मेरे सामनेवाली खिडकी में वगैरे सुरात सुरू होतं मी हात करून मस्तच ओ काका म्हणून आवाज दिला काका छान हसले. संध्याकाळी गप्पा मारताना आमचे साहेब म्हटले तीन नंबर बिल्डिंगमध्ये नवी फॅमिली मराठीच कुणीतरी आली दिसतेय. मराठी फॅमिली ऍड झाली की आपला पण दिल खुश होतो, रविवारी संध्याकाळी सोसायटीत खाली सगळ्याजणी भेटू तेव्हा नवं कोण आलंय त्यांची ओळख करून घेऊ असं मनोमन ठरवूनच टाकलं. वयस्कर पण वय चेहऱ्यावर न दिसणाऱ्या, गुलाबी गोरा रंग , सुंदर अशा काकू भेटल्या. एकंदरच प्रसन्न व्यक्तिमत्त्व. सून आणि मुलगा दिवसभर कामाला जातात , दोन वर्षांच्या नातीला काकू खूप छान सांभाळतात. मलाही गप्पा मारायला एक छान पार्टनर काकूंच्या रूपाने मिळाला पण काकूंचा हट्ट की मला ताई म्हण त्यांना बरं वाटतंय म्हणून ताई तर ताई.  परवा सकाळी सकाळी काकूकम ताईंचा जोरदार आवाज सोसायटीत घुमला, सगळ्यांची कामाला निघायची गडबड पण jcb लावल्यावर लोकं गोळा होतात तशी पटापट खिडकीतून, गच्चीतून डोकी बाहेर आली. 'क्या हो गया आंटी, सुबह सुबह क्यूँ चिल्ला रहे' एक आवाज कुठूनतरी आला , त्याला उत्तर म्हणून काकूंचा आवाज 'क्यूँ चिल्ला रहे म्हणजे, चिल्लायुं नको तर काय करू, ये सामने वाला बुढा काका रोज मुझे देखते हुए कुछ भी बकता है, इस्को समजाओ' च्यामारी आता सगळेजण अजूनच चार्ज झाले 'क्या बोलते है काकाजी' इकडून तिकडून विचारणा सुरू. 'अरे बोलते कुछ नहीं पण मुझे देखते ही इनको भागवान याद आते है और सदा सर्वदा योग तुझा घडावा , तुझे कारणी देह माझा पडावा ऐसा शूरु करते है' 'इसमे गलत बात क्या है, कुछ समजा नहीं , मेघना की मम्मी ईसका मतलब क्या है' म्हणून माझ्या नावाने दोन हाका. 'मुझे ऑफिसके लिये देर हो रही है भाभी, बाद में बताती हुं' म्हणून मी टाळलं, आमचे साहेब मात्र जोरदार हसत सुटले 'मानलं बुवा काकाला 😁😂'