हल्ली हल्ली

गुंतू नये वाटते कुठेही, पण
नजरेसमोर तू फार येतो हल्ली हल्ली

तू न केली दिशाभूल जराही
भान माझेच सुटते बघ हल्ली हल्ली

खेळ इथला तसा न्याराच सारा
संन्याशालाही मोह सुटतो हल्ली हल्ली

भुंकले जरी कुत्रे किती इमानी
चोरांचेच फार फावते हल्ली हल्ली

या तमाची पर्वा कधी केलीच नाही
सूर्यही पण दडू लागला हल्ली हल्ली

या दिशांनी काय केले पहा असे
पाय माझा घरात टिकेना हल्ली हल्ली

तसे कठोर आहे फार मन माझे
तू हसतो अन मी वितळते हल्ली हल्ली

तू माझाच ना मी कसे विचारू
मी मात्र तुझी होऊन चुकले हल्ली हल्ली

कविता तसाही माझा प्रांत नाही
यमक कसे जुळून येतात बुवा हल्ली हल्ली